Newyddion

Y CDC yn dweud wrth ymchwiliad ‘Mae angen gweithredu ar wytnwch economaidd yng Nghymru’

15 Mawrth 2010

Mae Comisiwn Datblygu Cynaliadwy Cymru wedi dweud wrth ymchwiliad y Cynulliad bod rhaid gweithredu nawr i sicrhau bod Cymru’n cynyddu gwytnwch yr economi yn wyneb bygythiadau disbyddu adnoddau a newid yn yr hinsawdd yn y dyfodol.

Mae’r ffactorau hyn eisoes yn cael effaith ddifrifol ar yr economi a bywydau pobl; effaith sydd wedi’i dwysáu gan y dirwasgiad, ac sydd yn debygol o waethygu dros amser, wrth i ni wynebu diwedd cyfnod yr olew rhad.

Yn ei sylwadau i ymchwiliad y Pwyllgor Menter a Dysgu ar ‘Creu Swyddi yn yr Economi Werdd’, pwysleisiodd y CDC yr angen am sicrhau bod yr economi mewn sefyllfa well i ymdopi â sioc amgylcheddol ac economaidd mewn modd nad yw’n ychwanegu at anghydraddoldeb nac yn mynd y tu hwnt i derfynau ecolegol.

Ymhlith y materion allweddol a amlygwyd gan y Comisiwn mae:

• Gwireddu’r weledigaeth o economi fwy cynaliadwy a gyflwynwyd yn y Strategaeth Swyddi Gwyrdd; gan weddnewid uchelgais yn ganlyniadau gwirioneddol, mesuradwy

• Datblygu diffiniad clir o union ystyr ‘swyddi gwyrdd’

• Harneisio’r cyfleoedd a gynigir gan y galw byd-eang am gynnyrch a gwasanaethau cynaliadwy

• Sicrhau bod Cymru, wrth ymdrechu i ymadfer wedi’r dirwasgiad, yn ystyried tueddiadau a risgiau hirdymor y dyfodol ac yn paratoi trwy fuddsoddi mewn meysydd megis ynni adnewyddadwy, trafnidiaeth gynaliadwy a chartrefi sy’n defnyddio ynni’n effeithlon.

Mewn ymateb i gwestiynau a ofynnwyd gan y Pwyllgor, cyfeiriodd y CDC at y prinder sgiliau mewn meysydd megis gwyddoniaeth a pheirianneg – a allai rwystro Cymru rhag cyflawni ei tharged blynyddol o ostwng carbon gan 3%.

Tanlinellodd y Comisiwn hefyd y cyfleoedd i’r llywodraeth fanteisio ar gaffael yn y sector cyhoeddus a chysylltiadau ag addysg uwch er mwyn annog a chefnogi busnesau cynaliadwy.

< yn ôl

English Version